Зэвсэгт хүчний 2016-2017 оны цэргийн сургалт бэлтгэлийн нэгдсэн төлөвлөгөө, ЗХЖШ-ын даргын тушаалаар Зэвсэгт хүчний ангиудын инженерийн дарга нарын цугларалтыг 2017 оны 4 дүгээр сарын 03, 04-ний өдрүүдэд зохион байгуулж явууллаа.

     Цугларалтад Зэвсэгт хүчний анги, байгууллагын 25 инженерийн офицерыг хамруулж “Мотобуудлагын бригадын инженерийн хангалтыг төлөвлөх” сэдвийн хүрээнд инженерийн хангалтыг төлөвлөн зохион байгуулах, удирдах аргад сургах зорилгыг дэвшүүлэн онол, дадлага, танилцуулах хэлбэрээр зохион байгууллаа.

     Цугларалтаар Хуурай замын цэргийн болон инженерийн цэргийн өнөөгийн байдал, хөгжлийн чиг хандлага, мотобуудлагын бригадын хориглох байлдааны инженерийн хангалтыг төлөвлөх, инженерийн хангалтын баримт бичиг боловсруулах, инженерийн салбаруудын боломж тооцоолох, инженерийн техник, эд хэрэгсэл, галт хэрэглэлийн ашиглалт, хадгалалт, арчлан хамгаалалт, бүртгэл, тооцоог хөтлөх аргачилал, инженерийн болон барилга, инженерийн анги, салбаруудын сургалт, НҮБ-ын сургалтын тогтолцоо, ХБНГУ-ын Зэвсэгт хүчний бүтэц, инженерийн сургуулийн сургалтын тогтолцоо, инженерийн салбар, зэвсэглэл, техникийн танилцуулга зэрэг сэдвүүдээр онолын сургалтыг явуулж, бүлгээр хувааж цэргийн байр зүйн зураг ашиглах дадлага, зураг дээр газар орныг инженерийн талаар үнэлэх, мотобуудлагын бригадын инженер сапёрын батальоны боломж тооцоолох аргад сургах бүлгийн дасгал боловсруулж, төгсгөлд нь инженерийн зэвсэглэл, цэргийн техниктэй танилцаж, жолоодлогын дасгал боловсруулсан.

      Анги, салбаруудын инженерийн техник, эд хэрэгсэл, галт хэрэглэлийн ашиглалт, хадгалалтыг сайжруулах зорилгоор “Инженерийн техник, эд хэрэгсэл, галт хэрэглэлийн ашиглалт, хадгалалт, арчлан хамгаалалт, бүртгэл, тооцоо” сэдвээр аргачилсан зааварчилгаа өгсөн.  

Цугларалтын үр, дүн:

Зэвсэгт хүчний ангиудын инженерийн офицерууд мотобуудлагын бригадын байлдааны инженерийн хангалтыг төлөвлөн зохион байгуулах, удирдах аргад суралцсан;

Зэвсэгт хүчинд ашиглагдаж байгаа байлдааны инженерийн хангалтын техник, эд хэрэгсэл, галт хэрэглэлтэй танилцаж ашиглалтын онцлогоос суралцсан.

ЗЭВСЭГТ ХҮЧНИЙ ХУУРАЙ ЗАМЫН ЦЭРГИЙН КОМАНДЛАЛ