Зэвсэгт хүчний 327 дугаар ангийнхан өвөлжилтийн бэлтгэл ажлыг хангах хүрээнд цөөнгүй бүтээн байгуулалтын ажил өрнүүлж, объектууддаа засвар шинэчлэл хийжээ. Тухайлбал, жагсаалын талбайгаа шаардлага, стандартад нийцүүлэн шинээр байгуулж, зэвсэглэл, цэргийн техникийн агуулахуудаа засварлаж, өнгө төрхийг нь сэргээн сайжруулсан байна. Түүнчлэн артиллерийн дивизионы цэргийн байрыг “Цэргийн албыг зохион байгуулах заавар”-ын дагуу шинэчлэн тохижуулж, ангийн шалган нэвтрүүлэх байрыг шинээр өргөтгөн зохион байгуулжээ. Өдгөө ангийн хэрэгцээний ургац хураалт, хадлангаа бэлтгэж, халаалт, дулааныхаа засваруудыг хийж байгаа ажээ.