Зэвсэгт хүчний Агаарын цэргийн штабын дарга хурандаа Б.Энхзоргол энэ оны 05 дугаар сарын 15-16-ны өдрүүдэд Зэвсэгт хүчний 065 дугаар ангийн харьяа 281 дүгээр байгууламжийн үйл ажиллагаа, үүрэг гүйцэтгэх бэлэн байдал, байлдааны жижүүрлэлт, цэргийн сургалт бэлтгэлийн явц, байдалтай танилцлаа.

     Тус байгууламж нь Монгол Улсын зүүн өмнөд бүсийн агаарын хил, орон зайд хяналт тавих үндсэн үүргээ хэрэгжүүлэхээс гадна цас зуд, малын гоц халдварт өвчин дэгдэх зэрэг байгалийн гамшигт үзэгдэл, онцгой нөхцөл байдал үүссэн үед орон нутгийн засаг захиргаанд дэмжлэг үзүүлэх, малчид, ард иргэдэд туслах олон талт үүргийг биелүүлэн ажиллаж байна.

     Агаарын цэргийн штабын дарга 281 дүгээр байгууламжийн барилга, байгууламжийн чанар байдал, станц техник, цэргийн аэродром, автомашинуудын ашиглалт, арчлан хамгаалалт, тусгай томилгоот бүлгүүдийн бэлтгэл, жигдрэлтийн байдалтай танилцсанаас гадна бие бүрэлдэхүүнтэй уулзаж, Агаарын цэргийн командлалаас дэвшүүлж буй хөгжлийн бодлого, зорилт болон хэрэгжүүлж буй онцлох ажил, арга хэмжээний талаар мэдээлэл хийж, алба хаагчдын санал, сэтгэгдлийг сонсон, чөлөөт ярилцлага өрнүүллээ.

     Түүнчлэн, бие бүрэлдэхүүнээс сэтгэл зүйн болон ажлын байрны сэтгэл ханамжийн байдлын судалгааг авч, алба хаагчдын нийгмийн хамгаалалд тулгамдаж буй зарим асуудлуудыг сонслоо.

хошууч  Г.ЭНХ-АМГАЛАН