Орчин цагийн зэвсэгт хүчин үүсэж хөгжсөний түүхт 103 жилийн ой, "Монгол цэргийн өдөр", Улсыг Агаарын довтолгооноос хамгаалах цэрэг үүссэний 60 жилийн ойг угтан Зэвсэгт хүчний 337 дугаар ангийн сахилга дэг журам бэхжүүлэх салбар зөвлөлөөс цэргийн алба хаагчдын сэтгэл зүй, бие бялдрын бэлтгэл, цэргийн хэргийн мэдлэг, тэсвэр хатуужлыг нэмэгдүүлэх, бүлгийн үйл ажиллагааны гар нийлэмжийг хангах зорилгоор "Бүлгийн марш-тусгай бэлтгэлийн тэмцээн"-ийг 8 салбарын 12 бүлгийн дунд сахилга дэг журам, хөдөлмөрийн аюулгүй байдлыг чанд сахиулан амжилттай зохион байгуулж явууллаа. 

     Уг тэмцээн нь оролцож буй цэргийн алба хаагчдын идэвх оролцоо, авхаалж самбаа, ур чадварыг сорьсон шударга өрсөлдөөний дунд явагдаж аваргуудаа тодрууллаа.

     Марш-тусгай бэлтгэлийн тэмцээн нь цэргийн хүний хийх ёстой, оролцох ёстой тэмцээн бөгөөд хамт олны багаар ажиллах чадвар, сэтгэл зүйн бэлтгэлжилтийг хангасан, алба хаагчдын дайчин нөхөрлөлийг бэхжүүлсэн, тэсвэр хатуужлыг нэмэгдүүлсэн, байгалийн ямар ч нөхцөлд тавигдсан үүргийг гүйцэтгэх суурь болдгоороо ач холбогдолтой байдаг.

     Тус тэмцээнийг зохион байгуулснаар Налайх цэргийн хотхон, цаашлаад Зэвсэгт хүчний аварга шалгаруулах марш-тусгай бэлтгэлийн тэмцээнд оролцох баг тамирчдыг сонгон шалгаруулж, дараагийн шатны тэмцээнд оролцох бэлтгэлийг хангуулах ач холбогдолтой болсон юм.

Дэд ахлагч С.Баярхүү