Зэвсэгт хүчний Агаарын цэргийн командлалаас цэргийн тэтгэвэр, чөлөөнд гарсан алба хаагчдад хүндэтгэл үзүүлэх ёслолын ажиллагааг зохион байгууллаа.

     Орчин цагийн Зэвсэгт хүчний Агаарын цэрэг хэмээх их айлын хөгжил дэвшил, өнөөдрийн өнгө, нэгэн жарны түүхийн шаргал хуудсыг бичилцсэн эрхэм хүндэт ахлах офицерууд цэргийн сүр хүчний бэлгэ тэмдэг болсон аранзал тугандаа хүндэтгэл үзүүллээ. Арга хэмжээнд хурандаа Н.Очирбат, С.Эрдэнэмөнх, Д.Батмөнх, дэд хурандаа Г.Түмэнбаяр, М.Баярбат, Ц.Идэрбат нар хүрэлцэн ирсэн юм.

     Бэлтгэл офицеруудад хандан Зэвсэгт хүчний Агаарын цэргийн командлагч хурандаа Т.Ганбат “Агаарын цэргийн төлөө залуу халуун нас, хүсэл тэмүүлэл, чинхүү үнэнч сэтгэл зүрхээ зориулсан та бүхэнд талархахгүй байхын аргагүй ээ. Хийсэн бүтээсэн бүхэн тань тод мөр болон үлдэж өнгөрсөн, өнөөдөр, ирээдүй гурван цагийн хэлхээс болж яваарай гэж захих байна. Цаашид ч ахмад үеийн төлөөллийн хувиар залуу үедээ үгээ хэлж, зөвлөж яваарай. Та бүхний гэр бүлд талархаж байна. Та нартаа талархаж байна. Аз жаргал, эрүүл энхийг хүсэн ерөөе” гээд командлалын уламжлалын дагуу бэлтгэсэн дурсгалын зүйл, салбарын медаль гардуулж өглөө.

     Харин бэлтгэл офицеруудыг төлөөлөн хурандаа Н.Очирбат “Та бүхэндээ баярлалаа. Одоо хөгжлийн үе эхэлжээ. Залуучууд та бүхний сурч боловсрох, ажиллах их үйлсэд арвин их амжилтыг хүсье. Нисгэгч хүний хувьд, цэргийн хүний хувьд Буянт-Ухаагийн нисэх зурвас дээрээс командлалынхаа туганд хүндэтгэл үзүүлэн цэргийн албатайгаа салах ёс гүйцэтгэж байгаа нь нэр төрийн хэрэг байна. Нэг тугийн дор жагсаж явсан та бүхэнд сайн сайхныг хүсье” гэсэн юм.  

Хошууч Л.САРАНЗАЯА