Батлан хамгаалах бодлого, зорилт, Зэвсэгт хүчний үйл ажиллагааг орон нутагт сурталчлах өдөрлөгийн  нээлт Ховд аймгийн төв талбайд зохион байгуулагдаж,  Батлан хамгаалахын дэд сайд А.Баттөр, Зэвсэгт хүчний ЕЗЦ-ийн командлагч, бригадын генерал Р.Сүхбат, Ховд аймгийн Засаг дарга Д.Цэвээнравдан, БХЯ, ЗХЖШ-ын зарим хэлтсийн дарга нар, Ховд аймаг дахь Үндэсний аюулгүй байдлыг хангах тусгайлсан чиг үүрэг бүхий байгууллагууд, Зэвсэгт хүчний 123 дугаар ангийн удирдлага, бие бүрэлдэхүүн оролцлоо.

            Ховд аймгийн Засаг дарга Д.Цэвээнравдан хэлсэн үгэндээ: “Сүүлийн жилүүдэд орон нутагт батлан хамгаалах салбар, Зэвсэгт хүчний нэр хүнд, цэргийн алба хаагчдын дадлага, мэргэжлийн ур чадвар ихээхэн өсч байна. Тус аймагт БХЯ-ны харьяа олон байгууллага, бие бүрэлдэхүүнийг хамарсан ажлын хэсэг ажиллаж, батлан хамгаалах бодлого, зорилт, Зэвсэгт хүчний үйл ажиллагааг сурталчлах ажлыг өндөр зохион байгуулалттай явуулж байгаад талархлаа илэрхийлье”  гэдгийг онцолж байлаа.

            Ховд аймагт Монгол цэргийн музейн үзэсгэлэнг дэлгэж, иргэдийн хүсэлтээр архивын лавлагаа, эмнэлгийн үзлэг, оношлогоогоор үнэ төлбөргүй үйлчилж, гэрээт цэргийн албыг сурталчлан, ЦДБЭЧ-ын уран бүтээлчид ая дуугаа өргөсөн. Мөн Зэвсэгт хүчний 123 дугаар ангийн байнгын бие бүрэлдэхүүний жагсаалын болон гардан тулааны үзүүлэх тоглолт, үлээвэр найрал хөгжимчдийн мэндчилгээг хүргэж,  бие бүрэлдэхүүний ёслолын жагсаал боллоо.

            Батлан хамгаалахын дэд сайд А.Баттөрийн санаачилга, дэмжлэгтэйгээр Зэвсэгт хүчний 123 дугаар ангийн байнгын байрлалд шинээр баригдсан Соёл, спортын төвийг ашиглалтад хүлээлгэн өгөх ёслолын ажиллагаанд оролцсон  Батлан хамгаалахын дэд сайд А.Баттөр: “Алдар гавьяаны түүхэн замналтай тус анги Зэвсэгт хүчний тэргүүний ангийн нэр хүндийг удаа дараа бататгаж, сүүлийн жилүүдэд улс, аймаг, Зэвсэгт хүчний хэмжээнд зохион байгуулсан спорт, урлагийн олон уралдаан, тэмцээнд бахархам амжилт гаргаж байгаад туйлын баяртай байдаг. Энэхүү соёл, спортын төвийг шинээр нээснээр танай бие бүрэлдэхүүний бие бялдар-сэтгэл зүйн бэлтгэлжилт улам дээшилж, спорт, урлагийн олон алдартнууд олноор төрж гарна гэдэгт итгэл төгс байна” гэдгийг бахархалтайгаар онцлон тэмдэглэсэн. 

Энэхүү соёл, спортын төвийн нээлтийн үеэр ЦДБЭЧ, Зэвсэгт хүчний 123 дугаар ангийн “Соёмбо” хамтлагийн уран бүтээлчид ая дуугаа өргөж, Зэвсэгт хүчний “Алдар” спорт хорооны тамирчид амжилтаа танилцуулж, үзүүлэх тоглолт зохион байгуулж, аймаг, сумын цолтой 32 бөхийн барилдаанд Зэвсэгт хүчний 123 дугаар ангийн Биеийн тамир, спортын дарга, аймгийн заан, ахлах дэслэгч Д.Уламбаяр түрүүлж, аймгийн начин Т.Эрдэнэдалай үзүүрлэв.

            Соёл, спортын төвийн нээлтийн ажиллагаа Ховд аймаг дахь үндэсний аюулгүй байдлыг хангах тусгайлсан чиг үүрэг бүхий байгууллагуудын дунд зохион байгуулсан гар бөмбөгийн тэмцээнээр үргэлжилж,   123 дугаар ангийн хошууч Ц.Содбаяр, ахмад У.Оюунчимэг ахлагчтай эрэгтэй, эмэгтэй багууд тэргүүн байр эзэлж, нийлбэр дүнгээр цомын эзэд болцгоов. Батлан хамгаалах бодлого, зорилт, Зэвсэгт хүчний үйл ажиллагааг сурталчлах ажилд оролцсон ЦДБЭЧ-ын уран бүтээлчид Ховд, Өвөрхангай аймгийн Хөгжимт драмын театр, Баянхонгор аймгийн “Тэмүүжин” театр, Зэвсэгт хүчний 123, 256 дугаар ангийн соёлын төвд урлагийн нэгдсэн тоглолт  хийж, иргэд, залуучууд, цэргийн алба хаагчдаас өндөр үнэлэлт авлаа.

 Монгол цэргийн музейн үзэсгэлэнг Зэвсэгт хүчний 123, 256, 339 дүгээр ангийн байрлалд дэлгэж,   бие бүрэлдэхүүнд үзүүлсэн. Түүнчлэн “Дуулга” телестудийн уран бүтээлийг сурталчлан, Батлан хамгаалахын төв архивт хадгалагдаж байгаа баримтат кинонуудаас цэргийн алба хаагчдад сонирхуулсан нь шинэлэг ажил боллоо.